Gladys Sariak 2026

Harritxu Gete, 2026ko Gladys Saria: euskaraz hitz egiten duen adimen artifiziala

Vicomtecheko ikertzaileak irabazi du eremu digitaleko euskal emakume gazteei zuzendutako seigarren edizioaren saria. Euskaltel Fundazioak erakunde kolaboratzaile gisa babesten duena.

Gladys Sariaren epaimahaiak Harritxu Gete Ugarte (Donostia, 1991) aukeratu du, eta bereziki hiru aspektu izan dira baloratu direnak: gaur egun euskararako erabiltzen diren itzultzaile neuronaletan egin duen ekarpena, bere lanari eransten dion genero-ikuspegia eta gazteentzat inspirazio iturri izateko duen ekimena. Sari-banaketa irailaren 24rako deitu zen, Donostiako Santa Teresa komentuan.

Matematikatik hizkuntza-ereduetara 

Gete Matematikan graduatu zen EHUn. Ondoren Hizkuntzaren Azterketa eta Prozesamendua masterra egin zuen eta espediente onenaren saria ere eskuratu zuen. 2025ean diziplina horretan bertan doktoratu zen cum laude aipamenarekin.

Bere ibilbide osoa Vicomtechen egin du: praktika batzuekin hasi zen, ikertzaile laguntzaile izatera pasa zen eta gaur egun itzulpen automatikoan eta hizkuntza-eredu handietan (LLM) ikertzen ari da.

Bere lanaren ardatzetako bat euskararen eta beste hizkuntza gutxitu batzuen presentzia digitala bultzatzea da. Eusko Jaurlaritzaren “Itzuli” itzultzaile automatikoaren eta Vicomtechen “Batua” itzultzailearen garapenean eta entrenamenduan lagundu du: bi tresna horiek egunero 300.000 itzulpen-eskaera baino gehiagori erantzuten diete. 

Bere ikuspegiak teknologiaren erabilera etiko eta inklusiboaren alde egiten du, halaber. Itzulpen automatikoko genero-alborapenak aztertu ditu eta lan hori lehen mailako kongresu zientifikoetan eta nazioarteko aldizkarietan zabaldu du.

Neska gazteentzako erreferentea 

Genero-berdintasunarekiko duen konpromisoa aspalditik dator. Inspira STEAM programako aholkularia da. Emakumeak Zientzian elkartearekin kolaboratzen du boluntario gisa, eta hitzaldietan, mahai-inguruetan eta komunikabideetan parte hartu du emakumeei eta gazteei erreferenteak eskaintzeko. 

Epaimahaiak bere proiekzioa ere nabarmendu du: hainbat proiektu gidatzen hasi da dagoeneko, bere lana gizartean aplikatzen da eta eragin zuzena du, eta bere dibulgazio-lanak bai bere ikerketa ezagutarazteko bai gazteentzako eredu izateko balio du.

Gladys Sariei buruz 

PUNTUEUS Fundazioak eta EHUko Informatika Fakultateak bultzatuta, sariak ingurune digitaleko euskal emakume gazteak aitortzen ditu, gazteriarentzat erreferenteak sortzeko eta euren lanari ikusgarritasuna emateko asmoz. Bere izenak Gladys del Estal informatikaria ekartzen du gogora. Babesle nagusiak Gipuzkoako Foru Aldundia eta Emakunde, Danobatgroup, EITB, EHUko Berdintasun Zuzendaritza eta Euskaltel Fundazioa dira.

Aurten, gainera, EITBk, PUNTUEUSek eta EHUko Informatika Fakultateak bideopodcast bat bultzatu dute, esparru teknologikoko emakumeei ahotsa emateko eta profesional gisa ez ezik, alderdi askotako pertsona gisa ere erakusteko. 

Euskaltel Fundaziotik, gure zorionak Harritxu Geteri. Zorionak!