Bizkaia Euskaltel Digital Centerrek ateak ireki ditu Bilbon

Joan den maiatzaren 6an, asteazkenean, Bilboko Euskadi plazan inauguratu zuten Bizkaia Euskaltel Digital Center (BEDC), prestakuntza eta berrikuntza digitalera bideratutako hub berria, Bizkaiko Foru Aldundiak eta Euskaltel Fundazioak elkarlanean sustatua.

Ekitaldian izan ziren Elixabete Etxanobe, Bizkaiko Ahaldun Nagusia, eta Luz Usamentiaga, Euskaltel Fundazioko presidentea, Euskadiko enpresa-, hezkuntza- eta erakunde-eremuetako ordezkariekin batera.

Lurraldearekiko konpromisotik sortutako proiektua

BEDC Bizkaia with the Talent estrategiaren barruan kokatzen da. Bizkaiko Foru Aldundiak bultzatutako ekimen horretan lurraldeko hezkuntza-, enpresa- eta erakunde-eremuko 40 erakundek baino gehiagok parte hartzen dute. Euskaltel Fundazioa proiektura batu izanak indartu egiten du Bizkaian talentu digitala erakartzeko eta garatzeko konpromiso partekatua, baita profil espezializatuen gero eta eskaera handiagoari erantzutekoa eta euskal ekoizpen-sarearen lehiakortasuna hobetzekoa ere.

Luz Usamentiagak azaldu zuen bezala, gune honek gure fundazioak euskal gizartearekin duen konpromisoa islatzen du: lurraldeko talentua balioan jartzeko eta eraldaketa teknologikoak planteatzen dituen erronkei berme osoz aurre egiteko lekua da, Euskadiko sustrai kultural eta linguistikoak ahaztu gabe.

Pertsona guztientzako prestakuntza, bizitzako etapa guztietan

Zentro berriak izaera integratzailea du. Prestakuntza-eskaintza profil askotariko pertsonei zuzenduta dago: taldeen gaitasun digitalak eguneratu nahi dituzten enpresei, enplegu bila ari diren pertsonei, ingurune digitalera egokitu behar duten adinekoei eta ekin edo lan-merkatu teknologikoan jauzia egin nahi duten gazteei.

Programak Europar Batasunaren Estrategia Digitalarekin lerrokatuta daude, eta eskaera handiko arloetan jartzen dute arreta: adimen artifiziala, zibersegurtasuna, 5G sareak, programazioa, datuen analisia eta 3D inprimaketa, besteak beste. Prestakuntza-eskaintza publiko bakoitzaren beharretara egokitutako egitarauetan antolatuta dago, eta ikaskuntza praktikoa sustatzeko diseinatutako esperientzia-laborategiekin osatzen da.

Bereziki nabarmentzekoa da zuntz optikoaren (FTTH) instalazioari buruzko doako ikastaroen eskaintza. Prestakuntza teoriko-praktikoa eta telekomunikazioen sektoreko enpresetan praktikak egitea  uztartzen dituzte, eta hazkunde iraunkorreko aukerak dituen eremu batean kalitatezko enplegurako bide zuzena eskaintzen dute.

Zentroak haur eta gazteentzako campus teknologikoak ere aurreikusten ditu, STEM bokazioak txikitatik modu eskuragarri eta parte-hartzailean sustatzeko helburuarekin.

Gainera, azpimarratzekoa da BEDCren beste ezaugarri nagusietako bat ikuspegi teknologiko hutsetik harago joateko duen borondatea dela.

Eremuak euskararekin, ekonomiarekin, kulturarekin eta berdintasunarekin lotutako gaiak ere jorratuko ditu, ekimenak lurraldearekin duen lotura estua berretsiz eta euskal gizarte osoarentzat benetan inklusiboa eta aberasgarria izango den eraldaketa digital baten aldeko apustua ere.

Etorkizuneko erronkei erantzuteko aliantza publiko-pribatua

Irekiera ekitaldian izan zen Meinrad Spenger MasOrangeko kontseilari delegatuak ere azpimarratu zuen zentroa prestakuntza-gune hutsa baino askoz gehiago dela: Euskadiren etorkizunarekiko konpromiso sendoa ordezkatzen duela, eta berrikuntza, inklusioa eta talentua batzen diren gunea dela, XXI. mendeko erronkei aurre egiteko gizarte prestatuago eta konektatuago bat eraikitzeko.

Ateak irekitzearekin batera, Bizkaia Euskaltel Digital Center Euskadiko ezagutza eta garapen-ekosistemara batu da, benetako eragina sortzeko bokazioarekin: gaitasun digitaletarako sarbidea demokratizatuz, eremu desberdinetako eragileak konektatuz eta lurraldeko eraldaketa digitalaren erdigunean tokiko talentua jarriz.