Euskal Encounter 34: BEC teknologiaren laborategi handi bihurtuko da

Uztailaren 23tik 26ra, Bilbao Exhibition Centrek (BEC) Euskal Encounterren beste edizio bat hartuko du beregan, Estatuko LAN party handiena eta Europako erreferentziazko hitzordu teknologikoetako bat. Hala baieztatu da atzo, uztailak 21, Bizkaia Euskaltel Digital Center-en (BEDC) egindako prentsaurrekoan, non 34. edizio honetako nobedadeen berri eman dute.

Euskal Encounterrek markak hausten jarraitzen du

Euskal Encounterrek 4.000 ordenagailu baino gehiago eta 5.000 parte-hartzaile inguru bilduko ditu aurten, eta 200 jarduera inguru eskainiko ditu, trebakuntza espezializatua, lehiaketak, sormen digitala eta dibulgazio teknologikoa ardatz hartuta. Ekitaldiaren azpiegiturak 70 Gbps-ko Interneteko konexioa izango du, Euskaltelek eskainia, milaka gailuri aldi berean zerbitzua emateko gai dena.

Aurten, programak eraldaketa digitala nabarmentzen ari diren bi teknologietan jartzen du arreta: adimen artifiziala eta konputazio kuantikoa, beste esparru batzuk alde batera utzi gabe, hala nola zibersegurtasuna, bideo-jokoen garapena, eduki digitalen sorrera edo hezkuntzari aplikatutako tresna teknologikoak.

Opengune: publiko guztiei irekitako teknologia

Ekitaldiaren erakargarritasun handienetako bat Opengune da, hitzaldiak, tailerrak eta erakusketak eskainiko dituen doako gunea. Bertan, adimen artifiziala, konputazio kuantikoa, zibersegurtasuna, bideo-jokoak, 3D inprimaketa, hezkuntza-teknologia eta ekimen solidarioak landuko dira.

Publiko eta ezagutza-maila guztientzat pentsatuta dago, eta teknologiara ikuspegi praktiko eta parte-hartzailetik hurbiltzeko aukera ematen du, gamer komunitateko edo informatikaren munduko kide izan beharrik gabe.

Talentua eta gizartea elkarlotzen

Aurkezpenean, Javier Gómez-Arruek, ekitaldiaren antolatzaile nagusiak, Euskal Encounter, “party” bat baino gehiago dela azpimarratu du: pertsonak eta haien proiektuak konektatzeko, teknologia gizartera hurbiltzeko eta sektorearen oraina eta etorkizuna erakusteko pentsatutako gunea da.

Euskaltel Fundazioaren aldetik, Nerea Enbeita zuzendariak nabarmendu du, erakundeak 25 urte baino gehiago daramatzala lanean teknologia pertsonei hurbiltzeko, STEM bokazioak pizteko, talentua trebatzeko eta eten digitalak murrizteko, eta ekimen gutxik laburbiltzen dituztela helburu guzti horiek, hala nola Euskal Encounterrek.

Joseba Mariezkurrena (Bizkaiko Foru Aldundia) eta Elixabete Garcia (Eusko Jaurlaritza) erakundeetako ordezkariek ere parte hartu dute, eta bat egin dute teknologiak talentuaren eta lehiakortasunaren palanka gisa lurraldearentzat duen zeregina azpimarratzean.

Euskaltel Fundazioak eta euskal ekosistema osoak babestutako ekitaldia

Euskaltel Fundazioak, Eusko Jaurlaritzak (SPRIren bitartez) eta Bizkaiko Foru Aldundiak babesten dute 34. Euskal Encounter, eta BBK Fundazioaren eta Euskaltelen laguntza ere badu. Erakundeen babesa du, eta ekitaldiak euskal ekosistema teknologikoaren barruan berrikuntzaren, ikaskuntzaren eta lankidetzaren eragile gisa duen balioa islatzen du.