Kaixo Mundua

PUNTUEUS eta Euskaltel Fundazioa: euskarazko nortasun digitala sustatzen

Mundu digitala ziztu bizian ari da aurrera egiten, eta funtsezkoa da euskarak ingurune horretan leku esanguratsua izango duela ziurtatzea, etorkizunean haren presentzia gorde eta indartzeko. Testuinguru horretan, PUNTUEUS Fundazioak eta Euskaltel Fundazioak indarrak batu dituzte Kaixo Mundua proiektua bultzatzeko. Hezkuntza-proiektu bat da Kaixo Mundua, eskola-komunitatean gaitasun digitalak bultzatzen dituena eta euskarazko nortasun digitala indartzen duena.

PUNTUEUS irabazi-asmorik gabeko erakunde bat da, segurtasun digitala bermatzeko eta Interneten euskararen erabilera sustatzeko lan egiten duena. Funtsezkoa da haren jarduna euskarak eta euskal kulturak, onlineko presentzia izateaz gainera, merezi duten lekua har dezaten eremu digitalean. Euskaltel Fundazioarekin daukan lankidetzari esker, ikasgeletara eraman da konpromiso hori, ikasleentzako proposamen praktiko eta motibatzaile batekin.

Programaren bidez, ikasleek benetako proiektuetarako web-orriak sortzen ikasten dute, eta, hala, gaitasun teknologikoak, sormenezkoak eta mundu errealarekin komunikatzekoak garatzen dituzte. Programazioaz harago, autonomia digitala, pentsamendu kritikoa eta taldean lan egiteko gaitasuna sustatzen ditu Kaixo Munduak, guztiak ere funtsezko trebetasunak gaur egungo ingurune digitalean.

Kontua ez da soilik programatzen ikastea, baizik eta ingurune digital segurua, fidagarria eta euskarazkoa eraikitzea. Gaitasun teknikoak eskuratzeaz gain, eduki digitala beren hizkuntzan sortzen laguntzen dute parte-hartzaileek, eta sareko identitate kulturala indartzen dute horrela.

Helburuak

Kaixo Mundua urrats bat da euskarazko espazio digital bat sendotzeko bidean, non gazteek hitz egiteko eta sortzeko aukera baitute, bai eta onlineko komunitatea aktiboki indartzeko ere.

Ikaskuntza digitala sustatzea: Ikasleei funtsezko gaitasun teknologikoak ematea ingurune digitalean moldatzeko.

Euskarazko nortasun digitala bultzatzea: Euskarazko onlineko edukiaren sorkuntza sustatzea eta euskarak arlo digitalean duen presentzia indartzea.

Sormena eta berrikuntza bultzatzea: Adierazpen digitaleko modu berriak aztertzea eta ideia originalak garatzea hezkuntza-ingurunean.

Ezagutza-trukea erraztea: Ikasleei esperientziak partekatzeko eta komunitatean ikasteko aukera emango dien gune bat sortzea.

Talde-lana: Proiektu digitaletan lankidetzan aritzen ikastea, komunikaziorako trebetasunak garatzea eta zeregin kolektiboak kudeatzea.

Segurtasuna ingurune digitalean: Onlineko ingurune seguru, fidagarri eta egungo beharretara egokitutako batean ikasteko aukera bermatzea.