Euskal Encounter

Teknologia ez da beti ikasgelan aurkitzen. Batzuetan, bat-batean, zerbait komunaren parte sentitzen diren ezezagunen artean partekatutako pantaila, elkarrizketa edo joko batean aurkitzen da. Horixe lortu genuen gure party teknologikoak antolatzean: berrikuntza hurbileko esperientzia bizi eta parte-hartzaile bihurtzea.

Ospakizun horiek —benetako jai digitalak— milaka pertsona biltzen dituzte berotasun kolektiboak, grina partekatua eta ikaskuntza horizontalak bat egiten duten esperientzia paregabe batean.

Bultzatzen ditugun partyak, konektibitatea ez ezik, hierarkiarik gabe sortu, ikasi eta partekatzeko aukera ere ospatzen dute. Programatzaile gazteak, gamerak, jakin-mina dutenak, sortzaile digitalak, garatzaileak, ikasleak… denek daukate beren lekua.

Jaia baino gehiago da mugimendu hori. Adierazpena da, komunitatea, kultura, identitatea… Izan ere, batzuetan, berrikuntza emozioz piztea da hura hurbiltzeko modurik ahaltsuena.

Teknologiarekiko grinak milaka pertsona batzeko ahalmena du, konexio soil bat komunitate indartsu bihurtzeko ahalmena, ezagutza berrikuntza-ikuskizun bihurtzeko ahalmena. Bidaia digital honetan, ekitaldi gutxik izan dute Euskal Encounterrek adinako distira, hitzordu hori harago zabaldu baita eta mundu teknologikoaren erreferente bihurtu baita.

Euskal Encounterren helburuetako bat da teknologiari buruzko ezagutzarik aurreratuena partekatzea, hainbat arlotakoa, hala nola adimen artifiziala, zibersegurtasuna, Gauzen Internet, machine learninga, kode irekiko softwarea eta konputazio kuantikoa. Eta, horretaz gain, ezagutza berria sortzeko sareak eratu eta gorabidean dauden teknologiak publiko guztietara hurbildu nahi ditu. Halaber, egungo erronketarako soluzio teknologikoak diseinatu nahi ditu, STEM arloko bokazio-harrobia sortu eta ekintzailetzaren eta berrikuntzaren bidez aurre egin etorkizuneko erronkei.